Vinnig, lekker EN Goedkoop.

Wie van ons het nog tyd vir regtig lekker eet? Ag, selfs eenvoudige etes raak haas onmoontlik. Ons kom dan eers na donker tuis – en dan nog kos opsit?

Maar moenie moed opgee nie — die geheim is: vinnig, lekker EN goedkoop. 😉

  1. Tyd-besparend met so min as moontlik tyd voor die stoof deurgebring.
  2. Geurig maar ook sappig en sag genoeg.
  3. Meer vir minder — snitte soos borsstuk, kookvleis of skenkel.

KAN goedkoop snitte vinnig EN lekker gaargemaak word? Maar natuurlik! Kom ek vertel jou bietjie:

* Dis waar, tydsduur, manier van kook en snit is belangrike bepalende faktore. Maar as jy jou stoompot (of ‘slow cooker’) inspan, kan jy verseker wees jou vleisie sal beide sag en sappig wees, maak nie saak watter snit jy gebruik nie.

* Jy besit nie een nie? Mens, hoe kom jy deur die lewe? 😉 Glo my, dit is ‘n belegging wat jy nie sal berou nie. Sodra die pot op stoom (of prut) is, gaan hy op sy eie aan. ‘n Stoompot kan op lae hitte voort stoom en vir die laaste halfuur kan jy selfs die stoof heeltemal afskakel.

*  Marineer daardie kookvleisie — dis NIE net braaivleis wat gemarineer kan word NIE. Pak jou vleisies in marinade in die yskas, ‘n dag voor jy dit wil gaarmaak, en kyk bietjie wat gebeur.

* Van marinade gepraat — Appelasyn maak enige potjie stowe-vleis vinniger sag, en dra baie by tot die smaak. En wat van ‘n paar lepels heuning op die koop toe? Probeer dit bietjie…

* In daardie taaier, goedkoper stukkie vleisie is ‘n bykomende stel voordele  opgesluit – want senings is ryk aan kollageen, en bene bevat minerale en gelatien – dinge waarsonder mens eintlik nie kan klaarkom nie.

* Saterdag se Braai? Wie het gesê ons mag net kook? Probeer bietjie Dikrib (Chuck) vir goedkoper braai — enige tyd net so lekker as T-been of Kruisskyf (Rump). (EN marineer, meneer!)

Vinnig, lekker, goedkoop en RYKER!

Nog ‘n stukkie? 😉

Daardie stukkie rooivleis op jou bord…

Het jy geweet: daardie stukkie rooivleis op jou bord kan dalk jou dood beteken? Nie nou dadelik nie maar regtig jong, jy moet oppas.

Hoor net hier — wetenskaplike studies het bewys dat rooi vleis:

* dalk aanleiding kan gee tot kanker.

* kan lei tot meer gediagnoseerde gevalle van diabetes.

* kan bydra tot die voorkoms van kardiovaskulêre afwykings.

Nee wag, wag… voor jy jou braaier weggee en jou tweede vrieskas afsit…   😉

Kom ons neem elke wetenskaplike studie met ‘n goeie knypie braaisout. Daar kan so maklik met woorde en syfers gespeel word – doelbewus of per ongeluk.

In die studies wat gedoen is:

         Is nie onderskei tussen geprosseerde, graangevoerde, hormoon-verrykte, antibiotika-gedokterde vleis aan die een kant, en onbehandelde, GMO-vrye, gras-gevoerde, hormoonlose vleis aan die ander kant nie.

         Is nie onderskei tussen onfikse rokende, alkohol-misbruikende rooi-vleis gebruikers, en gesondheidsbewuste rooivleis-verbruikers nie.

         Is nie onderskei tussen die wat gereeld hulle rooivleis kombineer met ‘slap tjips’ en die wat graag ‘vars groente’ daarmee saam eet nie.

En daar lê die hele knoop…

Is rooivleis ‘n ‘killer’ soos nuus-opskrifte net laasjaar weer berig het?

Navorsing dit, navorsing dat.. Om agter die kap van die byl te kom, lees hier. Maar… alles in ag genome, is die slotsom maar weer: “There are no convincing studies that red meat is harmful.”

(Kon ek hulle laaankal gesê het as hulle moeite gedoen het om MY te vra 😉  )

Nee wat, ons hoef nie skuldig te voel oor die rooivleisie op die bord nie. Die probleem lê nie by rooivleis nie, maar by watter rooivleis en hoe jy die res van jou lewe inrig.

Overgesetsynde:

* wat het die bees ingeneemGMO-graanvoer, ou brood, ‘n hormoonpilletjie, hoendermis of erger?

* wat het die slagter bygevoegMSG-speserymengsels en vleisversagters? Vullers?

* wat eet jy daarmee saam – ‘groenkragkos’ of ‘goeters’?

* hoe werk jy met jouself – rook-, drink-, slaap-gewoontes…?

Al hierdie faktore kan nogal ‘n rasende verskil maak as dit kom by jou gesondheid – maar onthou…

…as jy weet  waar jou vleis vandaan kom, kan jy eet met lus.

 

Gee jy Knoffel vir jou hond?

 

Ek kan nie eers onthou wanneer en waar ons begin het om knoffel vir ons Nguni’s te gee nie. Knoffel is ‘n natuurlike antibiotika, met ‘n magdom voordele vir mense – goegeloer maar ‘n bietjie.

En vir beeste? Baie min word gesê oor knoffel vir beeste – mens lees wel hoedat organiese beesboere dit met sukses gebruik om hul diere gesond te hou. Net soos ons.

Maar oral word gewaarsku teen knoffel vir honde en katte – dis gif vir hulle. Die rede? ‘n Sekere wetenkaplike studie het dit bewys.

Ek gaan kort wees. Hoor bietjie hier:

Vier honde, 1,25ml knoffel per kg liggaamsgewig, elke dag vir sewe dae lank. (Dis nogal kwaai oordoen.) Die resultaat: hondsiek? Nee. Springlewendig.

Maar deur bloedmonsters onder ‘n mikroskoop te bekyk kon hulle uiteindelik iets teen knoffel ontdek: die rooi bloedselle het tekens van beskadiging begin toon.

(Ek kan dink — teen daardie hoë dosis sal enige opregte bloedsel begin protesteer.)

En hoewel die honde (en daar was maar net 4) self geen simptome van bloedarmoede getoon het nie (selfs na al daardie knoffel), word hierdie studie steeds aangehaal as bewys dat knoffel lewensgevaarlik is vir troeteldiere.

Ek wil voorstel dat hulle weer gaan kyk na knoffel. En diere.

Lees verder hier (dis baie interessant).

 

Watertrap Weggee: Skoon Bene vir Beensop (Bonebroth)

Sommige van ons het al die lekker van bene afkook, ontdek. Maar as jy dit nog nie probeer het nie, moenie langer wag nie. Dis ‘n wonderlike manier om goeie, bekostigbare PROTEINE te bekom, en daarby sommer ook GELATIEN en minerale soos KALSIUM en MAGNESIUM  (iets wat mens veral bo 40 baie nodig begin kry) — in beensop kry mens alles, teen ‘n fraksie van die prys.

Of dit afval-bene is?

Nee, dis glad nie afval nie. Net oorskiet-bene, skoongesny, soos julle kan sien hierbo.

Wanneer ‘n bees-karkas verwerk word, bly daar noodwendig bene oor, waarvan die vleis afgesny is om maalvleis, wors, repies en blokkies te maak. Hierdie bene word mooi netjies opgesny in kleiner stukke (soos vir potjiekos of sop), en netjies verpak.

Dit is miskien nie ‘murgbene’ nie, maar net sulke goeie ‘sopbene’. Want dis nog vol stukkies vleis, sening en kraakbeen, en ~ wat die oog nie kan sien nie~ hope MINERALE soos kalsium en magnesium.

Ons gooi hierdie bene in ‘n pot met ‘n appel-asyn daaroor, en genoeg water, en laat dit prut vir minstens 5 ure (selfs tot 10 ure). Die sout kom eers teen die einde by. Die appel-asyn laat die minerale loskom, en met die sagkook word die kosbare gelatien vrygestel.

Uiteindelik haal ons die bene uit, en voeg groente en speserye/kruie by die sopperige fynvleisies om die heerlikste sop te maak.

Tussen hakies… ek het ‘n gratis e-boekie raakgeloop by WellnesMama met heerlike Beensop resepte —  Gaan kyk gerus daarna.

Wat maak ‘n Saterdag lekker?

Ons lewe in ‘n tyd waar elkeen gedwing word om noukeurig te besluit oor waar hy koop en wat hy eet.

Dit mag algemene boerdery-praktyk wees om diere vet te maak op graan en ‘n hormoon-pilletjie agter die oor, maar is daar ooit werklik indringend gekyk na die langtermyn-effek op die gesondheid van die verbruiker?

Wie se verantwoordelikheid is dit per slot van sake?

Die boer s’n of die verbruiker?

Ons glo: beide s’n.

Die boer moet die ou in die spieël in die oë kan kyk elke aand.

Die verbruiker moet aan die ou in die spieël kan verduidelik hoe en waar hy sy goeie gesondheid behou of verloor het.

Goeie gesondheid is onskatbaar van waarde. Mens gaan nie ligtelik daarmee om nie.

By Watertrap doen ons werklik ons bes om die vleisie aan die vurk op sy gesondste en lekkerste te hou. En die Nguni’s doen hul deel. Hulle beskik oor die uitsonderlike vermoë om droë gras om te sit in sappige tjops. Met net ‘n klein bietjie versorging en nugter verstand. 😉

My wens is dat elkeen vanaand by die braaivleisvuur met ‘n geruste hart sy bord mag uithou vir ‘n geurige, sappige stuk Nguni-vleis.

Smaaklike ete!

Wat maak ‘n Saterdag braai so lekker…